Google+ Adolphsdorf - Das freundliche Dorf im Teufelsmoor: Bang üm Verbott vun Versammeln Google+

Montag, 19. Januar 2015

Bang üm Verbott vun Versammeln

Berlin: Politikers vun all Parteien findt dat nich goot, dat för hüüt seggt worrn is, in Dresden droffen sick keen Lüüd versammeln. De Polizei hett weeten laten, se hett handfaste Henwiese up villicht een Anslag. Den SPD-Politiker Thierse hett an de ARD seggt, dor wöör bannig hatt in de Grundrechten ingrepen. Den CDU-Bunndagsafordneten Spahn verlangt, de Pegida-Bewegen müss weer lopen dörven. De Ämters in Dresden hebbt för hüüt all Versammeln unner frejen Heben verbaden. Dat geiht ok de Lüüd an, de tegen Pegida sünd.

Bahn un GDL verhannelt weer

Berlin: Lüüd vun de Bahn un de Gewarkschupp GDL kaamt hüüt tohoop un verhannelt vun niegen över Tarife. Dat geiht üm een Tarifverdrag för düt un villicht ok all för dat tokamen Johr. Beid Sieden hebbt verklaart, se willt bit to dat Enn vun’n Märzmaant dormit dör wesen. De Hauptsaak hebbt se all klaarkregen: De Bahn will dat gellen laten, dat de GDL ok för anner Lüüd bi de Bahn tostännig is un nich blots för de Lokföhrers. Dorüm sünd se vermoden, dat in tokamen Tieden woll nich lawayt warrt.

Strieden in de Ukrain

Nej York: De Generalsekretär vun de UN, Ban Ki Moon, de hett verlangt, dat dat Strieden in’n Osten vun de Ukrain foorts uphöllt. He weer vull vun Unroh, hett Ban seggt. An’t Weekenenn weern in’n Osten vun dat Land tominnst veerteihn Lüüd bi Scheetereen to Dood kamen. Sünnerlick böös tegenanner an gahn sünd de Trupps vun de Regeern un de Opsternatschen an’n Fleegerhaben vun Donezk. De ukrainschen un russschen Böversten smiet sick tegensietig vun niegen vör, dat den annern uphisst un sick nich an een Hollstopp hollen deit.

EU tegen de lilleken Lüüd

Brüssel: De Butenministers vun de achtuntwintig EU-Staaten holt hüüt Rat doröver, woans se tegen de lilleken Lüüd an willt. Na de Ansläg vun Paris geiht dat woll vör allen dorüm, woans de geheemen Deenste beter tosamen arbeit. Ok schall dat dorüm gahn, dat ok mit anner Nich-EU-Staaten tohoop arbeit warrt, so as ton Bispill mit de Törkei. De EU-Kommisschon hett ok över de Laag vun de Jöden in Europa klaagt. De tweete Vörsitter vun de Kommisschoon Timmermanns, de hett an de „Rheinsche Post“ seggt, he kunn nich mehr slapen, sietdem he dat Geföhl hett, dat de Jöden sick weer Sörgen maken mööt üm se ehr Seekerheet.

Keen Pakete mehr mit Sülvstfleegers

Nörddiek: De Düütsche Post brengt nich mehr Pakete up dat Eiland Juist mit een lütten Sülvstfleeger. Upstunns kiekt se na, wat bi de Fleegeree in’n verleden Harvst bi rutkamen is. De DHL harr vun September bit Dezember veertig Mal Druppens un Pillen vun Nörddiek to de Afthek up dat Eiland mit so een Paketfleeger bröcht. De DHL vermellt, dorbi hett dat keen Malessen nich geven.

Dat Weer

Un dorhen is dat Thermometer fullen: in Osterholt-Scharmbeck un an’n Bremschen Fleegerhaben  up null, up Wangerooge un an de Fiskereehabenslüüs in Bremerhaben up een Grod. Hüüt is de Heben weer wulkendüster un hen un wenn fallt een beten Snee of Sneeregen. An’n Namiddag warrt dat bilütten dröger. Bi een bit dree Grod weiht de Wind mau ut de Süden Kant. Tokamen Nacht wieder dichte Wulken, man drög bi null bit minus twee Grod. Un de tokamen Daag schall dat allens so blieven: keen Sünnschien, dichte Wulken, männigmaal ok düstergies een lüerlüüt beten Snee bi sowat dree Grod un slappen Wind ut Südwest. Dat weern de Narichten. 

Dat weern de Plattdüütschen Nahrichten vun'n 19. Januar 2015 (Radio Bremen). Ulrike Müller hett se tohoopstellt. Up Platt trechtmaakt un vörleest hett se Gesine Reichstein.

Und nu könnt ji fein leern för den 21. Jan., wenn seck de Plattsnackers droopt in't DGH!